Friday, July 16, 2010

കാസര്ഗോടിന്റെ പെരുമ
ഭാഷയുടെ അലങ്കാരങ്ങളും കസവുതൊങ്ങലുമില്ലാതെ ചില പൊള്ളുന്ന സത്യങ്ങള്‍ വിളിച്ചുപറയണമെന്നു തോന്നുന്നു. കന്നടയും, തുളുവും,കൊ‍ങ്കണിയും, ഉര്‍ദുവും, മലയാളവും, ബേരിയും സംസാരിക്കുന്ന സപ്ത ഭാഷാ സംഘമ ഭൂമി ആയ കാസരകോഡിന്റെ ഇന്നത്തെ അവസ്ഥ എന്താന്നു.....?. ചങ്ങലപോലെ നീളുന്ന ഹര്‍ത്താലുകള്‍. നാടാകെ ഭീതിയുടെ നിഴലിലമര്‍ന്ന അവസ്ഥ. അതിനുപുറമെ മൈല്‍കുറ്റികള്‍ തോറും പോലീസിന്റെ വിചാരണ. ഒരുകാലത്ത് നന്മകളാല്‍ സമൃദ്ധം എന്നഹങ്കരിച്ചിരുന്ന, മറ്റുള്ളവരോട് വടക്കിന്റെ സാംസ്കാരിക സൌന്ദര്യത്തെക്കുറിച്ച് പറയുമ്പോള്‍ ആഹ്ളാദിച്ചിരുന്ന ഒരു നാടാണിത്. കാസര്‍കോടിനെക്കുറിച്ചു തമാശക്കുപോലും മോശമായെന്തെങ്കിലും പറഞ്ഞാല്‍ ദേഷ്യം വരുന്ന ഒരു കാലമുണ്ടായിരുന്നു. എന്നാല്‍ ഇന്ന് വര്‍ഗീയ കോമരങ്ങള്‍ ഉറഞ്ഞു തുള്ളുന്ന നാടായി ഈ നാട് മാറിയിരിക്കുന്നു .
കാസര്‍കോടിന്റെ മനസ്സ് എന്നും സ്നേഹാര്‍ദ്രമായിരുന്നു. സാംസ്കാരിക പാരമ്പര്യമനുസരിച്ചുതന്നെ ഇവിടെ ഹിന്ദുവിനു മുസ്ലിമിനെയും മുസ്ലിമിനു ഹിന്ദുവിനെയും ശത്രുവായി കാണാന്‍ കഴിയില്ല. കാരണം ഇവിടെ മനുഷ്യനും മനുഷ്യനും തമ്മിലുള്ള ഗാഢബന്ധത്തേക്കാള്‍ വലുതായി ഒന്നുമുണ്ടായിരുന്നില്ല. കാസര്‍കോട്ട് ആദ്യത്തെ ബസ് റോഡലിറക്കിയപ്പോള്‍ ആ ബസിനു പേരിട്ടത് 'ഹിന്ദു മുസ്ലിം ബസ് സര്‍വീസ്' എന്നായിരുന്നു. അതിന്റെ കാച്ചിക്കുറുക്കിയ പേര് 'മനുഷ്യന്‍ ബസ് സര്‍വീസ്' എന്നായിരുന്നുവല്ലോ. വളരേക്കാലം തെക്കന്‍ കര്‍ണാടക ജില്ലയുടെ ഭാഗമായിരിരുന്ന കാസര്‍കോടിനു കേരളത്തില്‍ മറ്റാര്‍ക്കും കിട്ടാത്ത ചില അപൂര്‍വ സൌഭാഗ്യങ്ങള്‍ കിട്ടിയിട്ടുണ്ട് അതിലൊന്ന് സങ്കര ഭാഷാസംസ്കാരങ്ങളുടെ ധാരാളിത്തമായിരുന്നു. കൊടുത്തും വാങ്ങിയും ചന്തം വരുത്തിയ ഒന്നായിരുന്നു അത്.

No comments:

Post a Comment